Japanese Language and Culture Courses sa TESDA para sa Health Workers

111716

Kung kayo ay nurse o caregiver at target ninyong makapunta ng Japan, mainam kung mag-aral muna kayo ng Nihongo bago pa man kayo makaalis. Hindi madaling manirahan sa Japan ngunit maraming aspeto ang dadali kung may pundasyon na kayo sa pagsasalita at pagbabasa at pakikitungo sa mga Hapon.

Kaugnay nito, ni-relaunch ng TESDA ang kanilang Japanese Language and Culture courses kamakailan lang at nagsimula na silang magturo sa 191 nurses noong November 4, 2016 at tatagal hanggang May 19 sa susunod na taon.

Binuksan ni TESDA Secretary General na si Guiling Mamondiong at ni Japanese Ambassador to the Philippines na si Kasuhide Ishikawa ang programa. Ayon kay Ambassador Ishikawa, mas tataas ang tsansang makapasa ng mga marunong ng Nihongo sa Japanese national examination at mas magiging kaiga-igaya ang pagtratrabaho sa Japan kapag marunong ng Nihongo.

Matatandaan na ang pinakamahirap na requirement para sa mga nurses ang makapasa sa Kangoshi, ang national licensure examination ng mga nurses sa Japan. Hindi hihigit sa 10% lang ng mga foreign trainees ang pumapasa sa nasabing eksamen.

Sa ngayon nakaka-siyam na batches na ng mga health workers ang nag-aral sa program nito ng TESDA na nagtala na ng 971 na estudyante sa ngayon. Bisitahin lang ang www.tesda.gov.ph para sa higit pang impormasyon.

Mababasa pa ang higit na detalye sa Business Mirror.